(ရွှေအိမ်စည်)
(က)
နိုင်ငံတော်ငြိမ်ဝပ်ပိပြားမှုတည်ဆောက်ရေးအဖွဲ့ရဲ့ ကာကွယ်ရေးဝန်ကြီးဌာနက တပ်မတော်သားတွေအတွက် “စစ်သည်တော်ကျင့်ဝတ်” ဆိုတဲ့ လက်ဆွဲစာအုပ်ငယ်လေးကို ၁၉၉၂ခုနှစ် အောက်တိုဘာလ(၁)ရက် နေ့က ထုတ်ဝေခဲ့ပါတယ်။ တပ်မတော်ကာကွယ်ရေးဦးစီးချုပ် (ဗိုလ်ချုပ်မှူးကြီးသန်းရွှေ)ရဲ့ ညွှန်ကြားချက်အရ ထုတ်ဝေတာလို့လဲ လက်စွဲစာအုပ်ရဲ့ မျက်နှာဖုံးမှာ ရေးသားထားပါတယ်။ ဖြန့်ဝေတာကတော့ …..စစ်သည်တော်အားလုံး (တပ်မတော်သားအားလုံး) ကိုဖြန့်ဝေပါတယ်။ အဲ့ဒီမှာ ….. စစ်သည်တော် (တပ်မတော်သား) ဆိုရာမှာလည်း ဗိုလ်ချုပ်မှူးကြီးကစလို့ တပ်သားအဆင့်ထိ အကျုံးဝင်တာလို့ ဖွင့်ဆိုထားပါတယ်။
စာအုပ်ရဲ့ စာမျက်နှာ (၃)မှာ ……“ တပ်မတော်၏အစဉ်အလာ” ဆိုပြီး…..ခေါင်းစဉ်ငယ်တစ်ခုနဲ့ တပ်မတော်ရဲ့ အစဉ်အလာ (၁၂)ရပ် ကို ဖော်ပြထားပါတယ်။ ပြီးတော့ …..ဒီအစဉ်အလာ (၁၂)ရပ်ကို စောင့်ထိန်းဖို့လည်း ဆိုထားပါတယ်။ အစဉ်အလာ (၁၂)ရပ်ထဲက ပထမဆုံး အချက်က “ မျိုးချစ်တပ်မတော်ဖြစ်သည်” ဆိုတဲ့ အချက်ဖြစ်ပါတယ်။ ဒီတော့ ….. မျိုးချစ်တပ်မတော်ရဲ့ အစဉ်အလာကို စောင့်ထိန်းပါလို့ နားလည်ရပါတယ်…….။ မျိုးချစ်တပ်မတော်ရဲ့ အစဉ်အလာကို စောင့်ထိန်းမှလဲ ဒီနေ့ တပ်မတော်ဟာ မျိုးချစ်တပ်မတော်ဖြစ်သည် …..ဆိုတဲ့ အင်္ဂါရပ် နဲ့ ပြည့်စုံမှာပါ။
ဒီတော့ ……မျိုးချစ်တပ်မတော်ရဲ့ သမိုင်းမှန်ကူကွက် အချို့ကို ပြန်ကြည့်ကြရအောင်ပါ။
(ခ)
၁၉၄၅ ခုနှစ် စက်တင်ဘာလ ပထမအပတ်မှာ သီရီလကာင်္နိုင်ငံ ကန္ဒီမြို့မှာ မြန်မာ့တပ်မတော်သစ်နဲ့ပါတ်သတ်လို့ စာချုပ် ချုပ်ဆိုခဲ့ကြတယ်။ ကန္ဒီစာချုပ်ပါ ……။ မြန်မာဖက်က ဗိုလ်ချုပ်အောင်ဆန်းလက်မှတ်ထိုးပြီး ဗြိတိသျှတို့ဘက်ကတော့ ဗိုလ်ချုပ်ကြီး လော့ဒ်လူဝီမောင့်ဘတ်တန် လက်မှတ်ထိုးခဲ့တယ်။ စာချုပ်အရ…..မျိုးချစ်ဗမာ့တပ်မတော်ကို ဖျက်သ်ိမ်းပြီး ၊ စစ်အင်အား ၅၂၀၀နဲ့ ဗြိတိသျှဘားမားရိုင်ဖယ်တပ်တွင် ပူးပေါင်း၍ တပ်မတော်အသစ်အား ဖွဲ့စည်းသွားရန် ဖြစ်ပါတယ်။
တပ်မတော်သစ်တွင် ပါဝင်ကြမယ့် မျိုးချစ်ဗမာ့တပ်မတော်က အရာရှိတပ်မှူးတွေကို အင်္ဂလိပ်တပ်က စစ်ပညာသင်တန်း ပြန်ပို့ချပါတယ်။ တပ်ရင်း(၄)က တပ်မှူးတွေကို ပြည်မြို့မှာ သင်တန်းပေးတယ်။ ဗိုလ်ချုပ်ကြီးနေ၀င်း၊ ဗိုလ်မှူးချုပ် အောင်ကြီးတို့ တတ်ကြရပါတယ်။ တပ်ရင်း(၅)က တပ်မှူးတွေကိုတော့ ပျဉ်းမနားတွင် သင်တန်းပေးပါတယ်။ ဗိုလ်မှူးကြီးဇေယျတို့ ဗိုလ်မှူးကြီးကြည်မောင်တို့ တတ်ကြရပါတယ်။ မိတ္တီလာမှာဖွင့်တဲ့သင်တန်းကိုတော့ အမြောက်တပ်နဲ့အခြားတပ်က တပ်မှူးတွေ တတ်ကြရပါတယ်။ ဗိုလ်မှူးချုပ် အောင်ရွှေ၊ ဗိုလ်ချုပ်ကြီးတင်ဦးတို့ တတ်ကြရပါတယ်။ ဘားမားရိုင်ဖယ်တပ်ရင်း(၃) တပ်မှူးတွေရဲ့ သင်တန်းကိုတော့  သန်လျင်မှာဖွင့်ပါတယ်။ အဲဒီမှာ ဗိုလ်မှူးချုပ်ကျော်ဇော ၊ ဗိုလ်ချုပ်ကြီးစန်းယု၊ ဗိုလ်မှူးကြီး စိန်မြ၊ ဗိုလ်မှူးကြီး တင်မောင် (စာရေးဆရာ မြတ်ထန်) တို့ တတ်ကြရပါတယ်။ တပ်ရင်း(၃)သင်တန်းသား အားလုံးစုစုပေါင်း ၂၈-ယောက်ရှိပါတယ်။ အခြေခံစစ်ရေးပြ “လက်(ဖ)ရိုက်”..... “လက်(ဖ)ရိုက်” က စသင်ကြရပါတယ်။ ပြီးတော့ ….“ တပ်အုပ်ချုပ်မှုနဲ့ စစ်တပ်ဥပဒေ” ဘာသာရပ်တို့ကိုလည်း သင်ကြရပါတယ်။
တနေ့…..။
စစ်တပ်ဥပဒေဘာသာရပ်ကို သင်နေပါတယ်။
လူစုလူဝေးဆန္ဒပြမှုအား ဖြိုခွဲခြင်းအကြောင်းပါ။
လူစုလူဝေးဖြိုခွဲရာမှာ “ပြည်သူ့ရဲ” တို့နဲ့ မဖြေရှင်းနိုင်ပါက နယ်ဖက်အုပ်ချုပ်ပိုင်းမှ စစ်တပ်ကို အကူအညီတောင်းခံရပါတယ်။ အဲဒီအခါမှာ စစ်တပ်ဟာ လိုအပ်ရုံအင်အားနဲ့ လူစုလူဝေးကို ရင်ဆိုင်ရပါတယ်။ ပြီးတော့ …..တပ်ကိုအုပ်ချုပ်တဲ့ စစ်ဗိုလ်အရာရှိဟာ သက်ဆိုင်ရာ ခရိုင်တရားသူကြီးတစ်ဦးကိုလည်း သူ့အနားမှာ ခေါ်ထားရပါတယ်။ လူစုလူဝေးအား ပစ်ခတ်ဖို့ လိုအပ်ပါက ပစ်ခတ်နိုင်ရန် ပစ်ခတ်ခွင့်အမိန့်စာကို တရားသူကြီးထံမှ ရယူရပါတယ်။ ပြီးတော့ တပ်မှူးက လူစုလူဝေးရဲ့ အရှေ့မှာ မျဉ်းသားပြီး မျဉ်းကို ကျော်မလာဖို့ အကြိမ်ကြိမ် သတိပေးရပါတယ်။ အဲဒီလို သတိပေးရင်းနဲ့မှ လူစုလူဝေးဟာ မျဉ်းကို ကျော်လွန်လာလျှင် တပ်မှူးက တရားသူကြီးရဲ့ ပစ်ခတ်ခွင့်အမိန့်စာအရ ဆန္ဒပြသူတို့ရဲ့ ခေါင်းဆောင်လို့ ယူဆရသူ ……ဒါမှမဟုတ် တပ်ဦးက အလံကိုင်လာတဲ့လူကို တိတိကျကျ ညွှန်ပြပြီး တပ်သားကို ရိုင်ဖယ်သေနတ်နဲ့ ကျည်ဘယ်တောင့်ပစ်ပါဆိုပြီး ပစ်မိန့်ပေးရပါတယ်……။
ဒါက…..လူစုလူဝေးဖြိုခွင်းခြင်းဆိုင်ရာ စစ်တပ်ရဲ့ ဥပဒေဘာသာရပ်ရဲ့ သင်ကြားချက်ပါ။
သင်တန်းဆရာက ဘာသာရပ်ဆိုင်ရာ သဘောတရားကို ပို့ချပြီးတဲ့နောက် သင်တန်းသားတွေကိုကြည့်ပြီး လက်ချာဆက်ပေးပါတယ်။
“……ဟောဟိုလမ်းမကြီးပေါ်မှာ လူထုကြီးအလံတွေ ကိုင်လို့ ပါးစပ်ကလည်း အစိုးရကို ဆန့်ကျင်တဲ့ ကြွေးကြော်သံတွေအော်လို့ ချီတတ်လာနေကြတယ်……ခင်ဗျားတို့ ဘာလုပ်မလဲ……”
သင်တန်းဆရာက သင်တန်းသားဗမာ့မျိုးချစ်တပ်မတော်သား တပ်မှူးတွေကို မေးပါတယ်။
“………. ရှေ့ကို တတ်မလာပါနဲ့ လို့ သတိပေးမယ်”
သင်တန်းသားတပ်မှူးများက ဖြေကြတယ်။
“……ဟုတ်ပြီး……ကဲဗျာ တားလို့မရဘူး။ ရှေ့ဆက်တတ်လာကြပြီဆိုပါတော့ ခင်ဗျားတို့ ဘာဆက်လုပ်မလဲ”
သင်တန်းသားအားလုံး ဗမာ့မျိုးချစ်တပ်မတော်သား တပ်မှူးများအားလုံး ချက်ချင်းအဖြေမပေးနိုင်။ သူတို့အားလုံး၏အမြင်အာရုံတွင် ….. ဖဆပလအဖွဲ့ဝင်သခင်များနှင့်ပြည်သူလူထုကြီး …..။
“…..လွတ်လပ်ရေးချက်ချင်းပေး ”
“…..သူပုန်၊ သူပုန် ထ ထ…..”
ကြွေးကြော်သံများအား ဟစ်ကြွေးနေတဲ့ လူထုကြီးနဲ့ အနီခံကြယ်ဖြူတစ်ပွင့်အလံနီကြီးများ ……ခွပ်ဒေါင်းအလံများ ၀င့်၍၀င့်၍ ချီတတ်လာနေကြတဲ့ မြင်ကွင်းတွေကို သင်တန်းသားအားလုံး မြင်ယောင်နေကြတယ်။ သင်တန်းသားအားလုံးဟာ ငြိမ်သက်နေတယ်။ အဖြေမပေးနိုင်ကြသေး။ သင်တန်းဆရာက ထပ်မေးတယ်။
“….ကဲဗျာ …… ရှေ့ဆုံးက ချီတတ်လာတာက ဦးအောင်ဆန်း(ဗိုလ်ချုပ်အောင်ဆန်း) ဗျာ….။ သတိပေးလို့လဲမရဘူး……။ ဆက်ပြီးချီတတ်လာပြီ ခင်ဗျားတို့ ဘာလုပ်မလဲ ……။ ပစ်မလား။ မပစ်ဘူးလား ……“
“မပစ်ဘူး…..”
သင်တန်းသား ဗမာ့မျိုးချစ်တပ်မတော် ရဲ့တပ်မှူးတွေအားလုံးက အဖြေပေးလိုက်ကြတယ်။
ဤတွင် ကျနော်နားလည်လိုက်မိတယ်။
“ငါတို့သည် ……နိုင်ငံတော်နှင့် နိုင်ငံသားတို့၏ သစ္စာကို စောင့်သိရိုသေပါမည် ” ဆိုတဲ့တပ်မတော်သားတို့ရဲ့ နေ့စဉ် ရွှတ်ဆိုရသည့် သစ္စာအဓိဌာန်အား …….။
သို့သော် …… ယခု တပ်မတော်က …….။
ထားတော့ …..။
အဲ့ဒီတုန်းက သင်တန်းမှာ တတ်နေခဲ့ကြတဲ့ တပ်မှူးတွေဟာ ရဲဘော်သုံးကျိပ်ဝင်တွေပါတယ်။ ပြီးတော့ ဗမာ့လွတ်လပ်ရေးတပ်မတော်၊ ဗမာ့ကာကွယ်ရေးတပ်မတော် စတဲ့ တပ်မတော်တွေမှာ တာဝန်ထမ်းခဲ့ပြီး လွတ်လပ်ရေးအတွက် အသက်စွန့် တိုက်ပွဲဝင်ခဲ့ကြတဲ့သူတွေဖြစ်တယ်။ ဆိုရရင်တော့ ဒီနေ့တပ်မတော်ကြီးရဲ့ သန္ဓေသားတွေ….။ ဒီနေ့တပ်မတော်ကြီးရဲ့ ပထမမျိုးဆက်တပ်မှူးကြီးတွေ …….။ တင်ပြခဲ့တဲ့ အဖြစ်အပျက်ကိုကြည့်မယ်ဆိုရင် သူတို့တွေရဲ့ စဉ်းစားချက် ၊ ရပ်တည်ချက်၊ တွေးခေါ်ချက်နဲ့ လုပ်ဟန်တွေဟာ မျိုးချစ်တပ်မတော်ရဲ့ရပ်တည်ချက်နဲ့ လုပ်ဟန်တွေ ဖြစ်ခဲ့တယ်။ ဒါတွေဟာ မျိုးချစ်တပ်မတော်ရဲ့အစဉ်အလာကောင်းတွေပါ။ ဒီလိုအစဉ်အလာကောင်းတွေကို ဒီနေ့တပ်မတော်ကြီးဟာာ စောင့်ထိန်းထားနိုင်ကြသေးရဲ့လား။ မေးစရာတွေ ဖြစ်နေပါပြီ။ ဒါဟာ …..ဒီနေ့တပ်မတော်သားတိုင်း ဆန်းစစ်ကြည့်ကြဖို့ လိုသလို တစ်ဦးချင်းအဖြေပေးကြရမှာလည်း ဖြစ်တယ်။
အညွှန်း - ဗိုလ်မှူးကြီးတင်မောင်၏ “တိုင်းပြည်ကနုနု မုန်တိုင်းကထန်ထန်” စာမျက်နှာ (၁၃-၃၂)မှ
၂၀၀၈ခုနှစ် ဖေဖော်ဝါရီလ၌ Mizzima တွင် ဖော်ပြခဲ့သည်။
Subscribe to:
Post Comments (Atom)
No comments:
Post a Comment