(ရွှေအိမ်စည်)
(က)
ညသည်…..ညဉ့်သုံးယံအားလွန်ခဲ့ပြီ။ အမှောင်ထုက ပိန်းပိတ်အောင်မှောင်၍နေဆဲ…..။ အရှေ့အရပ်ကောင်းကင်တွင် ကွဲအပ်ကြောင်းရာအား မတွေ့ရသေး…..။ မြောက်လေက `မဲတုကွီ`တောင်ကြားလေးအတွင်းသို့ တိုးဝင်၍လာသည်။ ဝှေ့ဝှေ့ရမ်းရမ်း…..။ မြူနှင့်နှင်းသည် နေရာတိုင်း၌ ပြွတ်သိပ်၍ ထိုးဝင်နေသည်။အင်ဖတ်အမိုးပေါ်သို့ နှင်းစက်ကြွေသံအား ကြားရ၏။ မြောက်လေနှင့်ဝါးရွက်တို့ ထိတွေ့ပွတ်တိုက်သံက မြွေဟောက်တစ်ကောင်၏တွန်သံကဲ့သို့…..။ `မဲတုကွီ`ချောင်းငယ်၏ရေစီးသံအား နရီမှန်မှန်ပင် ကြားနေရ၏။ `မဲတုကွီ`က ငြိမ့်ငြိမ့်အေးအေးစီးရင်း…….ခရီးတိုအတွင်း `သောင်းရင်း`နှင့်ပေါင်း၏။
ည သည် ……တိတ်၍..ဆိတ်ငြိမ်၏။ စိမ့်၍.. အေးခဲလျက်…..။
မာနယ်ပလောသည် အမှောင်ထုအတွင်း ငြိမ်သက်စွာနှင့် ၀ပ်၍နေသည်။ သားကောင်အားခြောင်းနေသည့် ကျားရဲတစ်ကောင်ကဲ့သို့…..။ အုပ်စုဖွဲ့၍ ပျံသန်းသွားကြသော ငှက်တို့၏တောင်ပံခတ်သံအား သဲ့သဲ့ကြားရ၏။ အမှောင်ထုအတွင်း သူတို့ကား `နောတ` တောင်တန်းများဆီသို့ …..ပျံသန်း၍သွားကြ၏။
(ခ)
ကျနော်တို့အဖွဲ့၏ဌာနချုပ်က `မဲတုကွီ`ချောင်းငယ်နှင့် ဒေါ်အောင်ဆန်းစုကြည်လမ်းသွယ်၏အကြားတွင် ရှိသည်။ ဒေါ်အောင်ဆန်းစုကြည်လမ်းသွယ်က `ထီးသခီး` `မာနယ်ပလော` လမ်းအား အင်္ဂလိပ်စာလုံး တီပုံသဏ္ဍာန် ဦးတိုက်ထား၏။ လမ်းသွယ်၏တစ်ဖက်အဆုံးတွင်မူ သောင်းရင်းမြစ်၏လှေဆိပ်….။ ယခင်က ဤလမ်းသွယ်အား နံမည်မှည့်ခေါ်ထားခြင်းမရှိ….။ ၁၉၉၁ခုနှစ် ဒေါ်အောင်ဆန်းစုကြည် နိုဗယ်ငြိမ်းချမ်းရေးဆု ချီးမြှင့်ခြင်းခံရပြီးနောက်တွင် ဂုဏ်ပြု၍ မာနယ်ပလောတွင် ဒေါ်အောင်ဆန်းစုကြည်လမ်းဟူ၍ ဤလမ်းသွယ်အား မှည့်ခေါ်ခဲ့ခြင်းဖြစ်သည်။ လမ်းသွယ်နှင့်ချောင်းရိုးငယ်အကြား ကျဉ်းကျပ်သော မြေနေရာ၌ပင် အဆောက်အဦးများအား စီ၍ဆောက်ထား၏။ ဗဟိုရုံး၊ ဆေးခန်း၊ ခမ်းမကျယ်၊ စားရိပ်သာနှင့် လူနေအဆောက်အဦးများ…..။ အင်ဖက်မိုး၊ သဲပွတ်ခင်း၊ သဲပွတ်ကာ အဆောက်အဦးများ….။ လမ်း၏တစ်ဖက်တွင်မူ ကော်ဖီဆိုင်လေးများရှိသည်။
ကျနော်တို့ရုံး၏အရှေ့ကုန်းမို့မို့ပေါ်တွင် ပြည်သူ့လွတ်မြောက်ရေးတပ်ဦးရှိသည်။ DAB ရှိသည်။ DAB ရုံးရှိရာမှ သောင်းရင်းဘက်သို့ နိမ့်၍ဆင်းသွားလျှင် …..လူဘောင်သစ်ဒီမိုကရက်တစ်ပါတီဌာနချုပ် တည်ရှိ၏။ ကျနော်တို့ရုံး၏နောက်ကြောဖက် ကုန်းမြင့်ပေါ်၌မူ အရှင်ခေမာစာရ၏ ရဟန်းပျိုများသမဂကျောင်းဝင်းရှိသည်။ `မဲတုကွီ`ချောင်းနှင့် ဒေါ်အောင်ဆန်းစုကြည်လမ်းသွယ်က လျိုငယ်လေးအတွင်း ရောက်၍နေသည်။
လျှိုအတွင်းရောက်နေ၍လားမသိ……စိမ့်၍အေးခဲလျက်…..။ ဘားတိုက်၏အမိုးပေါ်သို့ နှင်းစက်ကြွေသံအားကြားနေရသည်။ ငြိမ့်ငြိမ့်အေးအေးစီးဆင်းနေသော `မဲတုကွီ`ချောင်းငယ်၏ ရေစီးသံက နရီမှန်မှန်ပင်…..။ ညငှက်၏တောင်ပံခတ်သံအား ဆိတ်ငြိမ်သော ညတွင် သဲ့သဲ့…..။ ဘာသူစောင်ဟုခေါ်သည့် ဂွမ်းစအနည်းငယ်ပါသည့် စောင်အား နှစ်ထပ်…ထပ်၍ ခြုံထားသော်လည်း အေးစိမ့်မှုသည် တွားသွား၍၀င်ရောက်နေ၏။
နိုးနေပြီဖြစ်သော်လည်း ဆိတ်ငြိမ်စွာနှင့်အိပ်ယာအတွင်း ငြိမ်သက်စွာ……။ အားလုံးက နိုး၍နေကြပြီး ဖြစ်လိမ့်မည်။ တစ်ခုခု…..။ အားလုံး၏အသိတွင် တစ်ခုခုအား ရင်မောစွာနှင့်…..။ အာရုံသည်လှပ၍ သန့်သန့်စင်စင်နှင့် မွေးဖွားလာမည်လား…..။တစ်ခုခု…..။
``စေ့စပ်လို့ မရတော့ဘူးဗျာ…..``
မနေ့ညနေက စားရိပ်သာအတွင်း ညစာစားရင်း ဥက္ကဌပြောခဲ့သည့်စကားသံများအား ကြားယောင်နေ၏။ ဥက္ကဌ၏မျက်နှာသည် ချောင်၍နေသည်။ ယခုရက်ပိုင်းအတွင်း ဥက္ကဌအလုပ်များခဲ့သည်။ စိတ်ပမ်းကိုယ်ပမ်းဖြစ်ခဲ့သည်။ သုမွဲထနှင့် မာနယ်ပလောကူးချည်းသန်းချည်းနှင့် ကူးလူးခဲ့ရသည်။ ဥက္ကဌတို့၏ သုမွဲထ၊ မာနယ်ပလော လွန်းပျံဒီပလိုမေစီက……. ဗိုလ်ချုပ်မောင်မောင်နှင့် ဖဒိုမန်းရှာတို့နှစ်ဦး အား သုမွဲထမှ ပြန်လာနိုင်ခဲ့ကြသည်။ ဤမျှသာ …..။ မတတ်နိုင်…..။ ရံဖန်ရံခါတွင် သမိုင်းသည် သူရေးထိုးချင်သလို ရေးထိုးတတ်ကြ၏။
အာရုံသည် နှောင်းလေစွ….။အလင်းသည် ၀ိုးတ၀ါး…..။ စမ်း၍….စမ်း၍ အမှောင်ထုအတွင်းသို့ ချည်းနှင်းဝင်လာ၏။ ရင်မောလှစွ…..။
ပို့ယမ်းပေါက်ကွဲသံအား သဲ့သဲ့ကြားရ၏။ `လောကွားလူ` ကုန်းဖက်မှဖြစ်မည်။ တစ်စက္ကန့်…နှစ်စက္ကန့်… သုံး…လေး…ငါး …တစ်ဆယ့်ငါး…….။
ကျယ်လောင်သည့်ယမ်းပေါက်ကွဲသံကြီးအား ကြားရ၏။
နောက်ထပ်…..နောက်ထပ်….. နောက်ထပ်…..။ ဆင့်၍…..ဆင့်၍…..။
`လောကွားလူ`ကုန်းမှ ပို့ယမ်းပေါက်ကွဲသံ သဲ့သဲ့…..။ ပြီးလျှင် ….`သုမွဲထ`ဆီမှ ကျယ်လောင်သည့် လက်နက်ကြီးကျကွဲသံကြီးများ…..။ စိတ်အတွင်း ထင့်နေသော တစ်ခုခု……သည် အစစ်အမှန်တကယ်ဖြစ်၍သွားပြီ။
`ချက်`ခေါ်သံအား ကြားမိ၏။ မြည်မြည်ဟီးဟီး…..။ မာနယ်ပလောသည် `ခွေ`ခံရပြီလား……။
၂၀၀၈ခုနှစ် နိုဝင်ဘာလ(၁၄) ရက်နေ့၌ Mizzima တွင်ဖော်ပြခဲ့သည်။
Subscribe to:
Post Comments (Atom)
No comments:
Post a Comment